मूँग दाल !

1.

ಇಂದು, ನಿನ್ನೆಯ ಒಡನಾಟಾದಲಿ ಕಳೆಯುತಿದ್ದೆ.
ನಿನ್ನೆಗೇ ಬೇಸರವೆನಿಸಿ ಮುಂದೆ ಹೋಗೆಂದಿತು.
ಇಂದೀಗ ನಿನ್ನೆಯಿಲ್ಲ.

ನಿನ್ನೆಯ ನೆನಪುಗಳ ಖಜಾನೆಯೊಂದರಲಿ ಶಬ್ದವೊಂದು ಸಿಕ್ಕಿತ್ತು.
ಇಂದು ಪ್ರಖರ ಬೆಳದಿಂಗಳು.

**************************************

2.

ಶಿಥಿಲ ಅಡಿಪಾಯದ ಮೇಲೆ ನಿಂತಿರುವ ಕೋಟೆ. 

ಮೇಲಿಂದ ಒಂದೊಂದೇ ಕಲ್ಲುಗಳು ಕೆಳಬಿದ್ದು ಒಬ್ಬೊಬ್ಬರನ್ನಾಗಿ ಕೊಲ್ಲುತ್ತಿವೆ. 

ಉಳಿದವರ ಕಣ್ಣುಗಳಲಿ ಧೂಳು ತುಂಬಿದೆ.

ಧರ್ಮಮಾರ್ಗದಲ್ಲಿ ಸಂಚರಿಸಬೇಕೆಂದರೆ 'ಧರ್ಮದ' ಅವಶ್ಯಕತೆಯೇನೂ ಇಲ್ಲವೆಂಬ ಸತ್ಯವಾಕ್ಯವ ನುಡಿದರೆ ಸ್ವಯಂಘೋಷಿತ ಧರ್ಮರಕ್ಷಕರಾರೂ ಮೆಚ್ಚರು ಮಂಕುತಿಮ್ಮ- ದೇವರಿಲ್ಲದಹಳ್ಳಿVG

**************************************

3.

ಹೇಗೋ ಒಮ್ಮೊಮ್ಮೆ ನಿರ್ಜೀವವವಾಗಿದ್ದ ಮೆದುಳಿನ ಭಾಗವೊಂದು ಅಗ್ನಿಪರ್ವತದಂತೆ ಭೋರ್ಗರೆಯುತ್ತಾ ಸಿಡಿದೆದ್ದು ಶಬ್ದಗಳ ಲಾವಾಪ್ರವಾಹವನು ಹರಿಸಿದಂತೆ!

ಗೋಜಲು ಗೋಜಲಾಗಿ ಬಿದ್ದಿದ್ದ ಹಳೆಯ ಬಟ್ಟೆಗಳ ಶಿಖರದಲ್ಲಿ ಸಿಕ್ಕಿದ ಕೆಂಪು ಬಸ್ಸಿನ ಟಿಕೇಟಿನಲ್ಲಿರುವ 2 ರಂಧ್ರಗಳನ್ನು ಕವಿತೆಯೆನ್ನಬಹುದೇ?

ಶಬ್ದಗಳಿಗೇನೋ ಸಮಯದ ಅಭಾವವಂತೆ.

ಆದರೂ ಇದೇಕೋ ತೋರುತಿದೆ ಬರೀ ನೆಪದಂತೆ.

ಕವಿತೆಯಾದರೆ ಬುದ್ದಿಜೀವಿಗಳು (ಅಪ) ಅರ್ಥ ಕಲ್ಪಿಸುತ್ತಾರೆಂಬ ಭಯವಂತೆ!

ಕನ್ನಡದಲ್ಲಿ ಒಂದೆರಡು ಸಾಲು ಗೀಚಿದೆ.

'ಓ, ಪರವಾಗಿಲ್ಲ, ಚೆನ್ನಾಗೇ ಇದೆ' ಅಂದುಕೊಂಡೆ.

ಇಂಗ್ಲಿಷಿಗೆ ತರ್ಜುಮೆಯೂ ಮಾಡಿದೆ.

ರಾಹುಲ್ ಗಾಂಧಿ ಮಾತನಾಡಿದಂತಾಯಿತು!

ಆಗೀಗ ಹೀಗೆ ಶಬ್ದಗಳು ಕುಣಿಡಾಡಿದಾಗ ಕವಿತೆಯಾಗಬಹುದೇನೋ ಎಂಬ ಹುಚ್ಚು ಬಯಕೆ!

**************************************

ಕನ್ನಡಿ

ಅದ್ಯಾವುದೋ ಅಸ್ಪಷ್ಟ ಭಾವವೊ೦ದರಲಿ, ಸ್ಪಷ್ಟ ಕನ್ನಡಿಯೊ೦ದನ್ನು ಒಡೆದಿದ್ದೆ.

ಇದ್ದರೂ ಇಲ್ಲದ೦ತಾಗಿ ಆ ಕಾಳ ರಾತ್ರಿಯಲಿ, ಕಣ್ಣು ಮಿಟುಕಿಸಿಕೊ೦ಡೇ ಮಲಗಿದ್ದೆ.

ಸುತ್ತಿಗೆಯೇಟುಗಳೇ ಹೀಗೆ, ತು೦ಬಾ ವಿಚಿತ್ರ.

ಮತ್ತೆ ಬಾರದೇ ಇರಬಹುದು ನಿಖರ ಚಿತ್ರ.

ಆದರೂ...

ಚೂರುಗಳನಾಯ್ದು ಸರಿಹೊ೦ದಿಸಿದೆ.

ಒಡೆದ ತುಣುಕುಗಳನು fevistickನಿ೦ದ ಬ೦ಧಿಸಿದೆ.

ಸರಿಪಡಿಸಿದ ಕನ್ನಡಿಯನ್ನು "ಮಾಡರ್ನ್ ಆರ್ಟ್" ಎ೦ದು ಕರೆದು ಯಥಾಸ್ಥಳದಲ್ಲಿ ತೂಗುಹಾಕಿದೆ.

ಈಗ ಹೇಳದಿರುವುದು ಬಾಕಿ ಏನೂ ಇಲ್ಲ; ಎಲ್ಲವೂ ಕನ್ನಡಿಗೆ ಗೊತ್ತಿದೆ.

ಒ೦ದಾಗಿದ್ದ ಮುಖ ಈಗ ಹತ್ತಾದೀತು.

(ಆದರೂ) ಪ್ರತಿ ತುಣುಕಿನಲ್ಲೂ ನನ್ನ ಮುಖ ಮತ್ತೆ ಕ೦ಡೀತು.

ಮೊದಲಿನ೦ತಲ್ಲದಿದ್ದರೂ ಈಗ ಮತ್ತೆ ನಾನಿದ್ದೇನೆ, ಕನ್ನಡಿಯೂ ಇದೆ.

ಕನ್ನಡಿಯೇ ಇಲ್ಲದೆ ನನ್ನನ್ನು ನಾನೇ ನೊಡಿಕೊ೦ಡ ಭಾವನೆ ಜೊತೆಗಿದೆ.

-ACP

--Inspired by a FB post by 'JOGI'.

Earth - aa ??! (ಅರ್ಥ??) ಗೊತ್ತಿಲ್ಲ..!!

ನಾನು ಭೂಮಿಗೆ ಹೇಳಿದ್ದು.....

"ದಿನವೂ ತಿರುಗುವ ಭೂಮಿಯೇ, ಒ೦ದೆರಡು ದಿನ ನಿ೦ತು ನೋಡು.

ಅದೇಕೋ ಜನಸಾಗರದಿ ಒ೦ಟಿಯಾಗಿರುವೆ, ಒ೦ದೆರದು ಕ್ಷಣ ಮಾತನಾಡು.

ಮಾತನಾಡೋಣವೆ೦ದರೆ ಸುತ್ತಲೂ ಯಾರೊಬ್ಬರೂ ಇಲ್ಲ (ಎಲ್ಲರೂ ಇದ್ದರೂ...!!)

ಬಾಗಿ ನೋಡಿದರೆ, ಮೌನಿ, ಬರೀ ನೀನಿರುವೆಯಲ್ಲಾ..!!

ನೀ ತಿರುಗುವುದಕೆ ಕಾರಣವು ಯಾರೊಬ್ಬರಿಗೂ ಗೊತ್ತಿಲ್ಲ!

ಆದರೆ ತಿರುಗುವ ನಿನಗೆ ನಿಲ್ಲುವುದೂ ಗೊತ್ತಿರಬೇಕಲ್ಲಾ..!!?

ಅವರೆಲ್ಲಾ ನೀನು ನಿಲ್ಲುವುದಸಾಧ್ಯವೆ೦ದು ತೀರ್ಪು ನೀಡಿಹರು.

ಬುದ್ಧಿಜೀವಿಗಳೆಲ್ಲಾ ನಿನ್ನ ಅಸಾಧ್ಯತೆಯ ಮೇಲೆ ಕವನ ಬರೆದಿಹರು.

ನಿನಗೆ ಸ್ವ೦ತಿಕೆಯೇ ಇಲ್ಲವೆ೦ಬ೦ತೆ ಎಲ್ಲೆಲೂ ಬಳಸಿಹರು.

ನಿರ೦ತರ ತಿರುಗುವಿಕೆಗೆ ಮನಬ೦ದ೦ತೆ ಅರ್ಥ ಕಲ್ಪಿಸಿಹರು.

ನೀ ತಿರುಗುವುದರ ಅರ್ಥ ನನಗೂ ಗೊತ್ತಿದೆಯೆ೦ದೇನಲ್ಲ.!

ಆದರೆ ತಿರುಗುವ ನಿನಗೆ ನಿಲ್ಲುವುದೂ ಗೊತ್ತಿರಬೇಕಲ್ಲಾ..!!?

ನಿನ್ನ ಜೊತೆಗಿರುವೆ ನಾ, ನನ್ನ ಮಾತನ್ನು ಕೇಳು.

ಒ೦ದೊಮ್ಮೆ ನಿ೦ತು ನೀ ಉತ್ತರವ ಹೇಳು.

ನಾ ತಿರುಗಿಸಿದ ಬುಗುರಿಯೂ ಸುಸ್ತಾಗಿ ನಿ೦ತು ಹೋಗಿದೆ.

ಮತ್ತೆ ತಿರುಗಿಸಬೇಕೆ೦ಬ ಆಸೆಯೂ ನನ್ನಲ್ಲಿ ಬತ್ತಿಹೋಗಿದೆ.

ಬಣ್ಣಬಣ್ಣದ ಬುಗುರಿ ತಿರುಗಿದಾಗ ಒ೦ದೇ ಬಣ್ಣಕ್ಕೆ ’ತಿರುಗಿತ್ತು’.

ನೀನೂ ಸ್ವಲ್ಪ ನಿ೦ತರೆ ಇನ್ನೂ ವರ್ಣಮಯವಾಗುವೆ ಅನಿಸಿತ್ತು.

ಆದರೂ ಯಾಕೆ ನೀ ಏನೂ ಕೇಳಿಸದ೦ತೆ ತಿರುಗುತ್ತಿದ್ದೀಯಾ??

ಅಥವಾ ಕೇಳಿಸಿಕೊ೦ಡು ನೊ೦ದು ಮರುಗುತ್ತಿದ್ದೀಯಾ??

ನೀ ದಯವಿಟ್ಟು ನಿ೦ತು ನಿನ್ನ ಕಥೆಯನ್ನು ಹಾಡು.

"ನೀನಿಷ್ಟೇ..!!" ಅ೦ದವರಿಗೆಲ್ಲಾ ಉತ್ತರವ ನೀಡು.

ಭೂಮಿ ನನಗೆ ಹೇಳಿದ್ದು......

"ಅರ್ಥವಾಗದವರ ಪ್ರಶ್ನೆಗಳಿಗೆ ಮೌನವೇ ಹಾಡು...!!

ನಾನೂ ಒ೦ಟಿಯಾಗಿದ್ದೇನೆ ಬಾ, ನನ್ನೊಡನೆ ಒಡನಾಡು..!!"

 -ACP

ಗೆರೆಯೆಳೆಯುವುದೆಲ್ಲಿ...??? (Where do we draw the line?)

ನಿನ್ನ ಹಸ್ತದಲ್ಲೊ೦ದು ಅನ೦ತ ಆಶ್ಚರ್ಯ.
ನಿಶ್ಯಬ್ದವಾಗಿ ಸತ್ಯ ಹೇಳುವ ರೇಖೆಗಳ ಚಾತುರ್ಯ.
ನಿಸ್ತೇಜಗೊಳ್ಳದ ಹಸಿವೆ ಆ ನಿನ್ನ ಕಣ್ಣುಗಳಲ್ಲಿ,
ಬೇಟೆಯನ್ನಾಗಲೇ ಹುಡುಕಿಟ್ಟಿವೆ ನೋಟಗಳಲ್ಲಿ.

ಹಾಗಾದರೆ...ಯಾಕೆ ಇನ್ನೂ ಈ ಊಹೆಯಾಟ..??
ವಿದಾಯವೋ, ಕಾಯುವುದೋ ಎ೦ಬ ಪರದಾಟ..!!

ನಾಳೆಯು ನನ್ನಿ೦ದ ಏನನ್ನು ಬಯಸುವುದೋ ನಾನರಿಯೆ.
ನಾ ಏನು ನೋಡಿದರೇನು?, ನಿಷ್ಪ್ರಯೋಜಕವೆ೦ಬುದು ಸರಿಯೇ.!
ನಾಳೆಯೆ೦ಬುದು ನನ್ನ ಚಿತ್ರಣವಾಗಿರುವುದಸಾಧ್ಯವಾದರೆ, ಕೇಳು...
ನಾ ಗೆರೆಯನೆಳೆಯುವುದೆಲ್ಲಿ ಎ೦ತಾದರೂ ನೀ ಹೇಳು..!!

ದಿನವೂ ರಸ್ತೆಯಲಿ ಜ್ವಾಲೆಗಳ, ನೆರಳುಗಳ ನೃತ್ಯ.
ಯಾರೂ ಕೇಳಿರದ೦ತಹಾ ಕಾವ್ಯದ ಸೃಷ್ಟಿ ಮಾಡುತ್ತಿವೆ ನಿತ್ಯ.
ಒ೦ಟಿತನದ ಭಾರ ನಿನ್ನ ಪಾದಗಳ ಮೇಲೆ ಕಾಲೂರಿ ನಿ೦ತಾಗಿದೆ.
ಆ ಬಡ ಹಕ್ಕಿಯ ಸುತ್ತಲೂ ಪ೦ಜರವ ಹೆಣೆದಾಗಿದೆ.

ಎಲ್ಲಾ ಮುರಿದು ಬೀಳುವ ಮುನ್ನ, ಪ್ರೀತಿ ಎ೦ದೆ೦ದಿಗೂ ಅತೃಪ್ತವಾಗುವ ಮುನ್ನ,
ಮುಖವಾಡ ಧರಿಸಿರುವವರ ಗು೦ಪ ಸೇರಿಕೊಳ್ಳೋಣವೇ ನಾವಿನ್ನ??!

ಆ ತ೦ಪಾಗಿಸುವ ಗಾಳಿಯೆಲ್ಲಿದೆ??
ಎ೦ದೂ ಹಸಿರಾಗಿರುವ ತೋಟಗಳೆಲ್ಲಿವೆ??
ಅವ್ವನ ತೆರೆದ ಬಾಹುಗಳೆಲ್ಲಿವೆ??
ಅಪ್ಪನ ಸಿ೦ಹದ೦ತಹ ಹೃದಯವೆಲ್ಲಿದೆ??

ಚಳಿಗಾಲದ ಕ೦ದು ತರಗೆಲೆಗಳೊ೦ದಿಗೆ,
ಎ೦ದೂ ದುಃಖಿಸದ ಆ ಅವನೊ೦ದಿಗೆ,
ಅದೇಕೋ ಸೂರ್ಯ ಮುಳುಗಿದ೦ತಿದೆ,
ಶೂನ್ಯ ಭೂಮಿಯಲ್ಲಿ ಮಲಗಿದ೦ತಿದೆ.

ನಾಳೆಯು ನನ್ನಿ೦ದ ಏನು ಬಯಸುತ್ತದೋ ನಾನರಿಯೆ.
ನಾ ಏನು ನೋಡಿದರೇನು? ನಿಷ್ಪ್ರಯೋಜಕವೆ೦ಬುದು ಸರಿಯೇ..!!
ನಾವೆಲ್ಲರೂ ಅ೦ಧನೊಬ್ಬನ ಹಿ೦ದೆ ನಡೆಯುತಿರೆ ಹೀಗೆ,
ಗೆರೆಯೆಳೆಯಬೇಕಾದುದೆಲ್ಲೆ೦ದು ತಿಳಿಯುವುದಾದರೂ ಹೇಗೆ??!!

ನಾಳೆಯು ನನ್ನಿ೦ದ ಏನು ಬಯಸಿದರೇನ೦ತೆ?!,
ನಾನಿಲ್ಲಿರುವೆನಲ್ಲಾ....ಗರಿಗೆದರಿದ ಹಕ್ಕಿಯ೦ತೆ.
ಜೀವನದ ಕುರುಹುಗಳನ್ನಾಯ್ದುಕೊಳ್ಳಲು ಮುಕ್ತ.
ತೋಚಿದಲ್ಲೆಲ್ಲಾ ಗೆರೆಯೆಳೆಯುವಷ್ಟು ಶಕ್ತ....!!!!

-ACP

-Translation of the song "Where do we draw the line" by Finnish band 'Poets of the fall'

ಹೀಗೊ೦ದು (ಹೀಗೂ) ಸಾವು .....ಎ೦ಚಿ ಸಾವು ಮಾರ್ರೆ..!!

    
ಆತ ಸತ್ತು ಹೋಗಿದ್ದ ಅ೦ದಿದ್ದರು.

ನೂರಾರು ಮ೦ದಿ ನೋಡಲೂ ಬ೦ದಿದ್ದರು.

ಸತ್ತಿದ್ದ೦ತೂ ನಿಜ, ಆದರೆ ಹೋಗಿದ್ದೆಲ್ಲಿಗೆ೦ದು ಯಾವನೊಬ್ಬನಿಗೂ ತಿಳಿದಿರಲಿಲ್ಲ.

ಸತ್ತಾತ ಹೋಗುವ ಮೊದಲು ಹೇಳಿರಲೂ ಇಲ್ಲ.

ಆತ ಹೋಗಿರುವುದು ನಿಜವೆ೦ದು ನ೦ಬುವ ಹಾಗಿಲ್ಲ.

ಇರುವುದಕ್ಕೆ ಸಮರ್ಥನೆ ನೀಡುವ ಸ್ಥಿತಿಯಲ್ಲೂ ಅವನಿಲ್ಲ.

ತಾವು ನೋಡಿದ್ದೇನೆ೦ದು ಅವರಿಗೇನೂ ತಿಳಿದ೦ತಿರಲಿಲ್ಲ.

ತಿಳಿದುಕೊಳ್ಳುವ ಗೋಜಿಗೂ ಅವರು ಹೋದ೦ತಿರಲಿಲ್ಲ.

ಒ೦ದೆರಡು ಕಣ್ಣೀರು ಬಿಟ್ಟರೆ ಅವರೇನೂ ಕಳೆದುಕೊ೦ಡ೦ತಿರಲಿಲ್ಲ.

ಈ ನಾಟಕದಲ್ಲಿ ಇಲ್ಲಿಗೆ ಕಥೆ ಮುಗಿಯಿತೆ೦ದುಕೊಳ್ಳುವುದು ಒ೦ದ೦ಕೆ.

ಮತ್ತೆ ಇದು ಆರ೦ಭವಿರಬಹುದೇನೋ ಎ೦ಬ ಸಣ್ಣದೊ೦ದು ಶ೦ಕೆ.

Shakespeare ಪ್ರಕಾರ ಹೇಳುವುದಾದರೆ ಅವನ ಸಾವು ನಾಟಕದ ಪಾತ್ರ.

Newton ಪ್ರಕಾರವಾದರೆ, ಸಾವೆ೦ಬ ಆಕ್ಶನ್ ಹುಟ್ಟೆ೦ಬ ರಿಯಾಕ್ಶನ್ ಗೆ ನೆಪ ಮಾತ್ರ.

ಹೇಗೆ ನೋಡಿದರೂ ಅವನು ಸತ್ತಿಲ್ಲ.

ಹಾಗಾದರೆ.........!!!

ಸಾವು, ನಾನು ಬರೆದದ್ದು, ಎರಡೂ ಏನೆ೦ದು ನನಗೆ ಗೊತ್ತಿಲ್ಲ...!!!!

ಈತ (ಸೂರ್ಯ), ಆತ ಮತ್ತು...???

ಇದೋ ಈಗ ಬ೦ದೆನೆ೦ದು ಹೇಳಿ ’ಆತ’ ಹೋಗಿದ್ದ.

ಒ೦ದೆರಡು ನಿಮಿಷಗಳೆ೦ದುಕೊ೦ಡೀತ ಶತಮಾನಗಳೇ ಕಾದಿದ್ದ.

ತನ್ನ ಸುತ್ತಲೂ ಸುತ್ತುತ್ತಿರುವ ಅವರ‍್ಯಾರನ್ನೋ ಕೆ೦ಗಣಿನಿ೦ದಲೇ ನೋಡಿದ್ದ.

ತನಗೇ ತಿಳಿಯದ೦ತೆ ಎಲ್ಲೆಲ್ಲೂ ಬೆಳಕನೂ ನೀಡಿದ್ದ.

ತನ್ನ ಅಸ್ಥಿತ್ವದ ರಹಸ್ಯವೇ ತಿಳಿಯದೆ ನಾ ಅನಾಥನೆ೦ದು ನೊ೦ದಿದ್ದ.

ಯುಗಯುಗಗಳು ಕಳೆದಿವೆಯಾದರೂ ’ಆತ’ ಹಿ೦ದಿರುಗಲಿಲ್ಲ.

’ಆತ’ನೇಕೆ ನಿಲ್ಲಹೇಳಿದನೆ೦ದು ಈತನಿಗೂ ತಿಳಿದಿಲ್ಲ.

"ಮೂರ್ಖಾ,!! ವರ್ಷಾನುಗಟ್ಟಲೆ ಹೀಗೇ ನಿ೦ತಿದ್ದೀಯಲ್ಲಾ"

ಎ೦ದಾಗ ಇತ್ತ ಉತ್ತರ "ನ೦ಬಿಕೆಯೆನ್ನುವುದೊ೦ದಿದೆಯಲ್ಲಾ..??!"

ಮುದಿತನದ ಮರೆವು, ’ಆತ’ನ ಮುಖದ ಯಾವೊ೦ದು ನೆನಪನ್ನೂ ಉಳಿಸಿರಲಿಲ್ಲ.

ಸುತ್ತ ಸುತ್ತುತ್ತಿರುವ ಮಹಾನುಭಾವರದ೦ತೂ ಮಾತೇ ಇಲ್ಲ.

ಎನೋ ವಿಚಾರಿಸೋಣವೆ೦ದುಕೊ೦ಡಾಗ ಮುಖ ತಿರುಗಿಸುವವರೇ ಎಲ್ಲಾ.!

ಎಲ್ಲದಕೂ ಉತ್ತರವ ಆತನೊಬ್ಬನೇ ಬಲ್ಲ.

ಎಲ್ಲೋ ಭಯದಿ೦ದ ಅಡಗಿದ್ದ ’ಆತ’ ಕೊನೆಗೊ೦ದು ದಿನ ಹೊರಬ೦ದಿದ್ದ.

"ಕ್ಷಮಿಸಿಬಿದಪ್ಪಾ" ಎ೦ದು ಈತನ ಮು೦ದೆ ಗೋಗರೆದಿದ್ದ.

ಪ್ರಶ್ನೆಗಳು ಕಾಡಿದಾಗ ತಾನು ಯಾರೆ೦ದು ’ಆತ’ನೂ ಪರಿತಪಿಸಿದ್ದ.

ತನ್ನ ಸ್ರುಷ್ಟಿಸಿದ್ದು ಇನ್ನೊಬ್ಬನೆ೦ದು ’ಅವ’ನ ಶಪಿಸಿದ್ದ.

ಈತನ ಸ್ರುಷ್ಟಿಸಿದೆನೆ೦ದುಕೊ೦ಡ ’ಆತ’ನಿಗೆ ಮು೦ದೇನೆ೦ದು ತಿಳಿಯದಾಯಿತ೦ತೆ.

ಸ್ರುಷ್ಟಿಯ ನ೦ತರ ನಡೆದ ಯಾವೊ೦ದು ಬದಲಾವಣೆಯೂ ಹಿಡಿತದಲ್ಲಿರಲಿಲ್ಲವ೦ತೆ.

ಆತನು ’ಆತ’ನೇ ಅಲ್ಲವೆ೦ದು ಆತನಿಗೀಗ ತಿಳಿಯಿತ೦ತೆ.

ಆತನೇನೂ ಸ್ರುಷ್ಟಿಯೇ ಮಾಡಿಲ್ಲವ೦ತೆ.

ಅಬ್ಬಾ..!! ತನ್ನ ಜವಾಬ್ದಾರಿ ಮುಗಿಯಿತೆ೦ದ ಈತ ಹೊರಡಲು ಅಣಿಯಾದ.

ಹೋಗುವುದೆಲ್ಲಿಗೆಯೆ೦ದು ತಿಳಿಯದೆ ಮರುಕ್ಷಣ ಬೆರಗಾದ.

ಹೋದರೂ ಮಾಡುವುದೇನೆ೦ದು ತಿಳಿಯದೆ ಕಲ್ಲಾದ.

ಸುತ್ತುತ್ತಿರುವರನ್ನು ಕ೦ಡಾಗ ಹಿ೦ದರಿಯದ ಭಾವೋದ್ವೇಗಕ್ಕೊಳಗಾದ.

ಅಗಲುವುದಸಾಧ್ಯವೆನಿಸಿ ಒ೦ದೊ೦ದೇ ಕಣ್ಣೀರೊರೆಸಿದ.

ಹಿ೦ದಿರುಗಿದಾಗ ’ಆತ’ನಿದ್ದ,

"ನಿನ್ನ ನೋಟದಲ್ಲೇ ಅವರೆಲ್ಲರ ಜೀವನ",ಅದಕ್ಕೇ ಅವರೆಲ್ಲ ಸುತ್ತುತ್ತಿರುವುದೆ೦ದ.

"ನಿನ್ನ ನೋಟವಿಲ್ಲದಿರೆ ಅವರೆಲ್ಲಾ ಇದ್ದರೂ ಇರದ೦ತೆ" ಎ೦ದ.

ಇನ್ನೇನೋ ಕೇಳಬೇಕೆನ್ನುವಷ್ಟರಲ್ಲಿ ’ಆತ’ ಮಾಯವಾಗಿದ್ದ.

ಯಾವ ಸುಳುಹೂ ಇಲ್ಲದ೦ತೆ ಕಾಣೆಯಾಗಿದ್ದ.

ಇತ್ತ ಈತ ಇನ್ನೂ ಕದಲದೇ ನಿ೦ತಿದ್ದ.

ಸುತ್ತುತ್ತಿರುವವರನ್ನೇ ದಿಟ್ಟಿಸಿ ನೋಡಿದ್ದ.

ತನ್ನೊಳಗಿನ ನೋವು ಕೋಪಗಳನೀಗಾತ ಕೊ೦ದಿದ್ದ.

"ಇದೇ ನನ್ನ ಜೀವನ, ಇದೇ ನನ್ನ ಕಾಯಕ" ಅ೦ದಿದ್ದ.

ಹೊರಟು ಹೋದವನಾಗಲೀ, ಬೇರೊಬ್ಬನಾಗಲೀ ಮತ್ತೆ ಬರುಉತ್ತಾನೆ೦ಬ ಯಾವ ನಿರೀಕ್ಷೆಯೂ ’ಆತ’ನಲ್ಲಿರಲಿಲ್ಲ.

ಅವನಿಗದು ಬೇಕಾಗಿಯೂ ಇರಲಿಲ್ಲ.

ತನ್ನ ಅಸ್ಥಿತ್ವದ ಯಾವ ಕುತೂಹಲವೂ ಅವನಲ್ಲೀಗ ಉಳಿದಿರಲಿಲ್ಲ.

ಇವೆಲ್ಲದರ ಮಧ್ಯ ’ಈತ’ ’ಆತ’ನಾದದ್ದು ಯಾರೊಬ್ಬರ ಗಮನಕ್ಕೂ ಬರಲಿಲ್ಲ.

ಆತ ಆತನೇ ? ಎ೦ಬುದು ಗೊತ್ತಿಲ್ಲ.!

ಆತನಾಗಿದ್ದರೆ ಓಡಿ ಹೊಗುತ್ತಿರಲಿಲ್ಲವಲ್ಲಾ..?

ಎ೦ಬೆಲ್ಲಾ ಸ೦ಶಯಗಳಿಗೆ ಉತ್ತರವಿಲ್ಲ.

"ಕೆಲವು ಪ್ರಶ್ನೆಗಳಿಗೆ ಪ್ರಶ್ನೆಗಳೇ ಉತ್ತರಗಳಾಗುತ್ತವಲ್ಲಾ"

ಎ೦ದೆಲ್ಲಾ ಅ೦ದುಕೊ೦ಡು ’ಆತ’ ಸ೦ತೋಷದಿ೦ದಿದ್ದ.

               .......................ಇ೦ದೂ ಇದ್ದಾನೆ.

               ........................ನಾಳೆ ಗೊತ್ತಿಲ್ಲ.!           

--ACP

ನಾನು ನಾನೇ ..!!?? Assertion as well as interrogation!

ನಾನು ನಾನೇ

ನನ್ನಿಂದಲೇ ಹುಟ್ಟಿ ಬೇರೆಡೆಗೆ ನೋಡುತ್ತಿರುವೆ.
ಅತ್ತಲೂ ಇತ್ತಲೂ ಕೋನವಾಗಿರುವೆ.

ಎಲ್ಲವೂ ನಾನೇ , ಎಲ್ಲವೂ ನನ್ನಿಂದಲೇ.
ಬೇರೆಯಾಗಿ ಕಂಡರೂ ಶುರು ಇಲ್ಲಿಂದಲೇ.

ಬೆಳೆಯುವುದು ಅಷ್ಟೊಂದು ಸುಲಭವಲ್ಲ.
ಬೆಳೆದಂತೆ ನಾ ನಾನಾಗಿರುವುದೂ ಇಲ್ಲ.

ಇದ್ದರೂ ನಾನಿಲ್ಲಿ ನಿನಗೆ ಕಾಣುವುದಿಲ್ಲ.
ನೀನೇ ಹೇಳುವಂತೆ ,ಹೀಗಿದ್ದರೆ ನಾ ನಾನಲ್ಲ.

ನಿರ್ದೋಷಿ ನಾ , ದೂಷಣೆಯು ಸಲ್ಲ.
ಲೋ ತಮ್ಮಾ ನಾ ರಾಜಕಾರಣಿಯಲ್ಲ.

ಇವೆಲ್ಲವ ಕೇಳಿ ನಾ ದೇವರೆನೋ ಎಂಬ ಶಂಕೆ ನಿನಗೆ.!
"ಇರಬಹುದೇನೋ"..?!! ಆದರೆ ನಾ ಅದೊಂದೇ ಅಲ್ಲ.!

ಮೂಢತೆಗೆ , ನಿನ್ನ ಮೂರ್ಖತನಕ್ಕೆ,
ನಾನೊಂದು ಬಿಳಿ, ಕಪ್ಪು ಚುಕ್ಕೆ.
ಎಂದೂ ಅಲ್ಲೇ ಇರುವೆ, ಕೇಳು ನಾನಾರೆಂದು.
ನಾನೇನೂ ಅಲ್ಲ , ಯಾರೂ ಅಲ್ಲ,ಸುಮ್ಮನೆ ಇಲ್ಲೇ ಇರುವ ಸಣ್ಣನೆಯ ಬಿಂದು.:-)

--Apoorva Chandra

ಒಂಟಿ - "Show me the meaning of being lonely"

ಒಂಟಿಯಾಗಿರುವುದರ ಅರ್ಥವನು ತೋರು,
ಒಡೆದಿರುವ ಹೃದಯಕ್ಕೆ ಶಬ್ದಗಳು ನೂರು,
ಕಡುಗೆಂಪು ಪ್ರೀತಿಯಲಿ ಕಾಣುವುದು ಕ್ಲಿಷ್ಟ ,
ಉಸಿರಾದುವುದನ್ತು ಇನ್ನಷ್ಟು ಕಷ್ಟ,
ನನ್ನೊಡನೆ ನಡೆಯುತಿರು ಇದುವೇ ನನಗಿಷ್ಟ.

ಬೆಳಕಿನ ರಾತ್ರಿಗಳಿಗೀಗ ಸ್ವಾತಂತ್ರದಾ ಹುಚ್ಚು , ಆವೇಶ .
ಪಡೆದೇ ತೀರುವೆವೆಂಬ ರೊಚ್ಚು , ಆಕ್ರೋಶ .
ತಾಕುತಿದೆಯೆನಗೆ ಸೂರ್ಯನಾ ಕಿಚ್ಚು , ಸಶೇಷ .

ಕಿಚ್ಚೆಲ್ಲ ನಾ ತಿಳಿದಂತೆ ಇಲ್ಲ ,
ಫಲಿಸುವುದು ನಿನ್ನ ಆಸೆಗಳು ಎಲ್ಲ ,
ಎನ್ನುವಾ ಸದ್ದೊಂದು ಕೇಳಿಸಿತು ಮೆಲ್ಲ ,
ಸದ್ದಿನಲೇ ಹೀಗೆ ಮಾಯವಾಯಿತಲ್ಲ ??!

ಒಂಟಿಯಾಗಿರುವುದರ ಅರ್ಥವನು ತೋರು ,
ಇದೇನಾ ಜೊತೆ ಬರುವ ಭಾವನೆಯ ತೇರು ?

ನೀನಿರುವ ಕಡೆ ನಾ ಇರಬಾರದೇಕೆ ?
ಹೃದಯದಳದೇನೋ ಕಳೆದುಕೊಂಡು ಒಂಟಿಯಾಗಿದ್ದರೆ ಸಾಕೆ ?

ಕೊನೆಯೇ ಇಲ್ಲವೆಂಬಂತೆ ಮುಂದೋಡುವ ಜೀವನ ,
ಬರಿಯ ಬದಲಾವಣೆಗಳನ್ನವಲೋಕಿಸುವ ಕಲ್ಲು ನಯನ ,
ಕೊನೆಯಿರದ ಪ್ರೀತಿಯ ಕಡೆ ಪಶ್ಚಾತಾಪದ ಪಯಣ ,
ಇದಕೆಲ್ಲಾ ಕೊನೆ ಎಲ್ಲಿ ?? ಶೂನ್ಯ ನಿಯಂತ್ರಣ .!!

ಈಗ ನೀ ನನ್ನ ಜೋತೆಗಿರುವೆಯಲ್ಲಾ ,
ನನಸಾಗುವವು ನಿನ್ನ ಕನಸುಗಳು ಎಲ್ಲಾ .
ನೀನೆಂದೂ ತೋರದ ಭಾವಗಳನೆಲ್ಲಾ,
ನಾ ತೋರಬೇಕೆಂಬುದಷ್ಟು ಸರಿಯಲ್ಲ..

ಓಡಿ ಹೋಗೋಣವೆಂದರೆ ಜಾಗಗಳು ತಿಳಿದಿಲ್ಲ ,
ನನ್ನದೇ ಅನ್ನಲೆನಗೆ ಪರಿಧಿಯೂ ಉಳಿದಿಲ್ಲ ,
ನನ್ನೀ ತನು ಮನ ಎದೆ ಆತ್ಹ್ಮಗಳನೆಲ್ಲ ,
ಅರ್ಪಿಸುವೆ ನಿನಗೆ ಇನ್ನೇನೂ ಉಳಿದಿಲ್ಲ !!

ಹೃದಯದಲ್ಲೇನೋ ಕಳೆದುಕೊಂಡು ಒಂಟಿಯಾಗಿದ್ದರೆ ಸಾಕೆ..?
ನೀನಿರುವ ಕಡೆ ನಾ ಇರಬಾರದೇಕೆ ?? ??

-ACP ( Translation of " Show me the meaning of being lonely " by Backstreet Boys)

ಚಿಟ್ಟೆ ಪಾತರಗಿತ್ತಿಗೆ ಹೇಳಿದ್ದು :-)

ಯಾರೋ ಹಾಡಿದ ನೆನಪು,ಎಲ್ಲೋ ಕೇಳಿದ ನೆನಪು,

ಪಾತರಗಿತ್ತಿ ಪಕ್ಕ, ನೀ ನೋಡಿದ್ಯೇನ ಅಕ್ಕ .?
ನೀನೂ ಕೇಳಿರುವೆಯಾ ನನ್ನ ಪಾತರಗಿತ್ತಿ ಅಕ್ಕಾ ..?

ದೂರದಲಿ ಅದೇನದು ಸೆಳೆಯುತಿದೆ ಕಣ್ಣ.?
ಒಹ್ ,ನಿನ್ನ ರೆಕ್ಕೆಯ ಮೇಲೆ ಅದೆಷ್ಟು ಬಣ್ಣ.?

ನೀನಿರಲು ಸನಿಹದಲಿ ಕುಣಿಯುವುದು ಮನವು.,
ನೀನಿರಲು ಜೊತೆಯಲ್ಲಿ ಮನವಾಗುವುದು ಮಗುವು.

ಹಾರೋಣ ಬಾ ನಾವು ಒಂದಷ್ಟು ಹೊತ್ತು,
ನೀಲ ನಭದಲೊಂದು  ಸಣ್ಣನೆಯ ಸುತ್ತು.

ನೀ ನಗುತ ಹಾರುತಿರೆ ಸಂಭ್ರಮವು ಎನಗೆ,
ಯೋಚನೆಯ ಮಾಡದಿರು ನಾನಿರುವೆ ನಿನಗೆ.

ಹೂವಲ್ಲ ದೂರದಲಿ ರವಿಯೆಂದು ಗೊತ್ತು,
ಅವನ ನೋಟದಲೆಲ್ಲೋ ಹೂವಂತೂ ಇತ್ತು.

ಭುವಿಯಂತೆ ರವಿಯಲ್ಲಿ ನಂಬಿಕೆಯನಿಟ್ಟು,
ಆ ರವಿಯ ನೋಟದಲಿ ನೋಟವನು ನೆಟ್ಟು,

ನೋಟದಾ ದಿಕ್ಕಿನಲ್ಲಿ ಹಾರೋಣ ನಾವು,
ಸಿಗಬಹುದು ಚಂದದಾ ಒಂದೆರಡು ಹೂವು.

ಜೊತೆಗಿರಲು ಅಕ್ಕಾ ನಿನ್ನ ಮುದ್ದಾದ ಪ್ರೀತಿ,
ಜೊತೆಗಿರುವೆ ನಾ ನನಗಿಲ್ಲ ಭೀತಿ.

ಅದೋ ನೋಡಲ್ಲಿ ಸಣ್ಣನೆಯ ಬಿಳುಪು,
ದೂರದಲಿ ಕಾಣಿಸಿದೆ ಎಂಥದೋ ಹೊಳಪು.

ಅಬ್ಬಬ್ಬ ನೋಡಲ್ಲಿ ಮಲ್ಲಿಗೆಯ ಮಾಲೆ,
ಇರುವಂತಿದೆ ಮಲ್ಲಿಗೆಗೂ ಪಾಠಶಾಲೆ.

ಮರೆತೆ ಹೋಗಿರುವೆ ನಾ ಬಂದಿರುವ ದಾರಿ,
ಹೋಗುವುದೆಂತೀಗ  ನಾವು ಹಿಂದಿರುಗಿ ಹಾರಿ.?

ದೂರದಾ ರವಿಯತ್ತ ಕೈಸನ್ನೆ ಮಾಡು,
ಅವನೆತ್ತ ನೋಡುವನೋ ನೀನತ್ತ ನೋಡು.

ಹಾರುವಾ ಸಮಯದಲಿ ಮರೆಯದಿರು ನನ್ನ,
ಪುಟಾಣಿ ಚಿಟ್ಟೆ ನಾ ಅಪ್ಪಿರುವೆ ನಿನ್ನ. :-)

ಮೇಲ್ನೋಟ - A contrast

ಪುಟಾಣಿ ಮಗುವಿನ ಸಂಭಾಷಣೆ ,
ಜೊತೆಗೆ ಅನಂತ ಅನ್ವೇಷಣೆ,
ತನ್ನದೇ ಕಣ್ಣಿನಲಿ ವಿಶ್ವ ವಿಶ್ಲೇಷಣೆ,
ಪುಟ್ಟ ಮೆದುಳಿಗಿದು ದ್ಯುತಿ ಸಂಶ್ಲೇಷಣೆ.

ದುಂಡನೆಯ ಕಣ್ಣಿನಲ್ಲಿದ್ದರೂ ಬಿಳಿ ಕಪ್ಪು,
ಅದಿನ್ನೂ ತಿಳಿದಿರಲಿಲ್ಲ ಜಗದ ಬಿಳಿಯೂ ಕಪ್ಪು.
ಅದಕೇನೋ ಕಣ್ಣಿನಲಿ ಮಿಂಚುವಾ ಹೊಳಪು,
ಕತ್ತಲಲೂ ಹಗಲಲೂ ಎಲ್ಲವೂ ಬಿಳುಪು .

ಮೀನೊಂದು ನೀರಿಂದ ಹೊರಬಂದು ನಿಂದು,
ನರಳುವುದು ಕಾಣಿಸಿತು ನೀರಿಲ್ಲವೆಂದು,
ಹೇಳಿತ್ತು ಮೀನೊಡನೆ ಮಗುವಲ್ಲಿ ಬಂದು,
"ನಡೆ ನೀನು ಗೆಳೆಯಾ ಮನೆಯತ್ತ" ಎಂದು.

ಒಂದೆರಡು ಕ್ಷಣ ಮೀನು ಹೊರಳುತ್ತ ಇತ್ತು,
ಮಗುವನ್ನೇ ದಿಟ್ಟಿಸುತ ಧೊಪ್ಪೆಂದು ಬಿತ್ತು,
ಬಿಟ್ಟಿರುವ ಕಣ್ಣುಗಳು ಹಾಗೆಯೇ ಇತ್ತು,
ಕಣ್ಮುಚ್ಚಿ ಬಿಟ್ಟಾಗ ಹೋಗಿತ್ತು ಸತ್ತು.

ದೂರದಲಿ ಕೇಳಿಸಿತು ಅಮ್ಮನಾ ಕೂಗು,
ತನ್ನೊಡನೆ ಬರಲಿಲ್ಲ ಮೀನಂತೂ ಹೇಗೂ,
ಎನ್ನುತ್ತ ಬೇಸರದಿ ಬಿಕ್ಕುತ್ತ ಮಗುವು,
ಹೇಳಿತ್ತು "ನೀ ನೀರೊಳಗೆ ಹೋಗು".

ಮಂಡಿಯಲಿ ಮುಖವಿಟ್ಟು ನೋಡಿತ್ತು ಮಗುವು,
ಮೀನಿನಾ ಆಟಕ್ಕೆ ಬರುತಿತ್ತು ನಗುವೂ,
ತಿಳಿಯಲೇ ಇಲ್ಲವದಕೆ ಮೀನಿನಾ ನೋವು,
ಕಲ್ಪನೆಗೂ ನಿಲುಕದ್ದು ಮೀನಿನಾ ಸಾವು .
-ACP

ಕನಸು

ಇಂದಿಗೆ ಇಷ್ಟೇ ..!ಈಗ ಮುಳುಗುವನು ಸೂರ್ಯ.
ಇನ್ನೆಲ್ಲ ಬರಿಯ ಚಂದ್ರನದೇ ಕಾರ್ಯ.
ತಾರೆಗಳ ಜೋಡಣೆಯಲ್ಲಿರಬಹುದಾ ರಹಸ್ಯ..?
ನನಗಂತೂ ತಿಳಿದಿಲ್ಲ ನನ್ನಯಾ ಭವಿಷ್ಯ.

ಕನಸುಗಳು ತಲೆಯಾಚೆ ಮೇಲೆದ್ದು ಬಂದು,
ಕೂಗುವುದು ಕೇಳಿಸಿತು ಆಗಸದಿ ನಿಂದು.
"ನಾವಲ್ಲ ನೋಯಿಸುವ ಕಣ್ಣೀರ ಬಿಂದು,
ಜನನವಷ್ಟೇ ನಮಗೆ ಸಾವಿಲ್ಲವೆಂದೂ .!

ಜನಿಸುತಿವೆ ಕನಸುಗಳು ದೈತ್ಯ ಫೀನಿಕ್ಸ್ ನಂತೆ ,
ಜೊತೆಗೆ ತಿಳಿಯದಿಹ ಪ್ರಶ್ನೆಗಳ ಸಂತೆ.
ಪ್ರಶ್ನೆಗಳ ಪೋಣಿಕೆಯೋ ಅದು ಜೇಡರ ಬಲೆಯು,
ಕರಗತವಾಗಿಲ್ಲವೆನಗೆ ಅದ ಬಿಡಿಸುವಾ ಕಲೆಯು.

ಕನಸುಗಳು ಕೆಳಗಿರುವ ಭೂಮಿಯಂತೆ,
ಆಸೆಗಳು ಕೆಳಬೀಳೋ ಸೇಬಿನಂತೆ.
ನಡು ನಡುವೆ ಏನೇನೊ ಅನಿಶ್ಚಿತತೆಯಂತೆ,
ಮನದೊಳಗೆ ಆಗಾಗ ಅದರದೇ ಚಿಂತೆ.

ಮುಂಬರುವ ಉತ್ತರಗಳಾಗಬಹುದು ಬರಿಯ ಸಮೀಕ್ಷೆ,
ಇದಾಗಿರಬಹುದು ಬರಿಯ ಜೀವನ ಪರೀಕ್ಷೆ.
ಆದರೂ ಗೂಡೊಳಗಿನ ಹಕ್ಕಿಯಾ ಹಾಗೆ,
ನಂಬಿರುವೆ ನಾ ಕಾದಿರುವೆ ಹೀಗೆ.

ಬೆಳಕ ಸೂರ್ಯನು ಇಂದು ಬಹು ಬೇಗ ಬಂದ,
ಹೋಗುತಿರೆ ಚಂದ್ರನು ಅದೇನೋ ಅಂದ,
"ನನಸಾಗಿಸು ನಾ ಕೊಟ್ಟ ನೂರು ಕನಸ,
ತಡರಾತ್ರಿ ಬರುವೆನು ಹೊತ್ತು ಇನ್ನೂರು ಕನಸ".

ಚಂದ್ರನೂ ಮುಗಿದಂತೆ ಮುಗಿಯಿತೀ ರಾತ್ರಿ,
ಸೂರ್ಯನಿಗೆ ದಿನವಿಡೀ ಕೆಲಸವಾಯ್ತು ಖಾತ್ರಿ.
ನನ್ನ ಕೆಲಸವೂ ಇಹುದು ಬಹಳಷ್ಟು ಇನ್ನೂ,
ದೂರ ಬೆಟ್ಟದಲಿಲ್ಲ ಮೆಟ್ಟಿಲುಗಳಿನ್ನೂ ..!:-)

-- Apoorva Chandra.P

ಸಣ್ಣದೊಂದು ನಶೆ- -हल्का सा इक नशा

ಸಣ್ಣನೆಯ ನಶೆಯೊಂದು ಸುಮ್ಮನೇ ಯೇರಿಹುದು,
ಹಾಗೆಯೇ ಕಣ್ಣಿನಲಿ ಕಾಣದೇ ಮಿಂಚಿಹುದು.

ನಿನ್ನನೆ ನೋಡುತಿರೆ ನನ್ನದೀ ಎದೆಯಿಂದು,
ತನ್ನೊಳಗೆ ಏನೇನೊ ಗುನುಗುತಿಹುದು.

ನನ್ನೆದೆಯ ಭಾವಕ್ಕೆ ಜೀವ ತುಂಬಿದೆ ನೋಡು,
ದೂರವನ್ನು ಕಳೆದೊಗೆದು ಬಳಿ ಬಂದು ಕೂಡು .

ಮೈ ತಣಿಸುವಾ ಈ ಹವೆಇರಲು ಹೀಗೆಂದೂ,
ನನ್ನೊಳಗಿನ ಉತ್ಸಾಹ ಹೆಚ್ಚುತಿದೆ ಇಂದೂ.

ದೂರದಾ ನೋಟದಲಿ ಯೇನಿಹುದು ಖುಷಿಯೇ..?
ಮಾಯೆಯೇ ನೀ ನನ್ನ ಮಿಡಿತದಲಿ ಮಿಡಿಯೇ..!

ಧ್ವನಿಯಲ್ಲಿ ಧ್ವನಿಯಿಟ್ಟು ನನ್ನೆದೆಯೀಗ ನಿನ್ನ
ಕೂಗುತಿದೆ ಜೋರಾಗಿ ಬಳಿ ಬರಲು ಎನ್ನ ....!

--ಅಪೂರ್ವ ಚಂದ್ರ (translation of the Ghazal called "Halka sa ek nasha" sung by Hariharan)

ಇಷ್ಟ

ಜೀವದಾಗಸದಲ್ಲಿ ನಗುವಿನಾಗರದಲ್ಲಿ ನನ್ನ ನೀ ನಿನ್ನತ್ತ ಸೆಳೆಯುತಿರುವೆ
ಯಾವುದನೂ ಹೇಳದೆಯೇ ಯಾರನೂ ಕೇಳದೆಯೇ ನನ್ನ ಮನವನೆತ್ತಲೋ ನೀ ಒಯ್ಯುತಿರುವೆ .

ಏನ ಹೇಳಲಿ ಕಂದ ನಿನ್ನ ನೋಟವು ಚಂದ,
ಆಡುವಾ ಮಾತುಗಳು ಅಂದಚಂದ.

ನಿನ್ನ ನಾ ನೋಡುತಿರೆ ಜಗವೆಲ್ಲ ಅಂದ ಮನಸುಗಳ ನಡುವಿಹುದು ಕಾಣದಾ ಸಂಬಂಧ .
ಸುಮ್ಮ ಸುಮ್ಮನೆ ಬರುವೆ ನೂರು ನೆನಪನು ತರುವೆ ,ನನ್ನೇಕೆ ಹೀಗೆ ನೀ ಕಾಡುತಿರುವೆ .?

ಅಲ್ಲಿ ನೋಡಲು ನೀನೆ ,ಎಲ್ಲಿ ನೋಡಲು ನೀನೆ ,ಕಾಡುವ ವಿದ್ಯೆಯಲಿ ನೀ ಪ್ರವೀಣೆ !
ನೀ ಮನಕೆ ಬಾರದ ದಿನಗಲೊಂದೂ ಇಲ್ಲ ನಿನ್ನದೇ ನೆನಪಲ್ಲಿ ಕಳೆವೆ ನಾ ದಿನವೆಲ್ಲ.

ಕಣ್ಣೆದುರು ನೀ ನಿಂತು ,ಮನದಲ್ಲಿ ನೀ ಬಂದು ,ಯೋಚನೆಯ ಮಾಡುವುದೇ ನನಗೀಗ ಕಷ್ಟ .
ನಿನ್ನ ಸಿಹಿ ನೆನಪುಗಳು ಕಷ್ಟವಾದರೂ ಇಷ್ಟ ,ಕಾರಣವೂ ತಿಳಿದಿಲ್ಲ ನೀನನಗೆ ಇಷ್ಟ....!!!:-)

--ಅಪೂರ್ವ ಚಂದ್ರ

ಅಗೋಚರ

                                                          ಅಗೋಚರ

ಸುಮ್ಮನೇ ಕುಳಿತಿರಲು ಮನದ ಬರುಭೂಮಿಯಲಿ ಬರುವ ನೂರು ನೆನಪುಗಳ ಹೆಸರು ನೀನೇ..!

ಆ ಹೆಸರ ಹೇಳುತ್ತ ಮನವೆಂಬ ಮಾಯಾವಿ ನುದಿಸುತಿಹ ನೋಡಿಲ್ಲಿ ಈ ರುದ್ರವೀಣೆ..!



ತಿಳಿಯದಾದರು ಎನಗೆ ತಂತಿಯ ಬಲವು,

ರಭಸದಲಿ ಮೀಟಲೆನಗೊಂದಿಷ್ಟು ಭಯವು.



ಇಂಪಾದ ಧ್ವನಿಯೊಂದು ಬಾರದಿದ್ದರೂ ಎಂದೂ,

ಧ್ವನಿಯೊಂದು ಇದೆಯೆಂಬ ಸಾಂತ್ವನವು ಮನಕಿಂದು.



ಮುಂದೊಮ್ಮೆ ಹೇಗೋ ಇಂಪಾದ ಧ್ವನಿಯೊಂದು,

ಮೂದಲೂಬಹುದೆಂಬ ಆಸೆ ಮನದಂಚಿನಲೊಂದು.



ನಿನ್ನ ಸುಂದರ ನೆನಪುಗಳು ಕಾಡಿರಲು ಮನವನ್ನು,

ಸುಮ್ಮನೇ ದಿಟ್ಟಿಸುವೆ ತಂತಿಯನು,ಮೇಲಿರುವ ನನ್ನ ಬೆರಳನ್ನೂ.....!
 
                                                                    --Apoorva chandra

ಪಯಣ

This is an attempt to translate the song "Boulevard of broken dreams" by GREENDAY into namma kannada.


                                        ಪಯಣ

ನಡೆಯುವೆನು ನಾನೊಂದು ಒಂಟಿ ದಾರಿಯಲಿ ..
ಎಂದಿಗೂ ತಿಳಿದಿರುವ ಅದೇ ಹಾದಿಯಲಿ..


ತಲುಪುವಾ ಜಾಗವದು ತಿಳಿಯದಾದರು ಇಲ್ಲಿ ,
ದಾರಿಯಲ್ಲದೆ ಎನಗೆ ಬೇರೆ ಮನೆಯೆಲ್ಲಿ..?


ನಡೆಯುವೆನು ನಾನೀ ಖಾಲಿ ರಸ್ತೆಯಲಿ ,
ಚೂರಾದ ಕನಸುಗಳ ದೊಡ್ಡ ಕಣಿವೆಯಲಿ .


ಕತ್ತಲಲಿ ರಾತ್ರಿಯಲಿ ಮಲಗಿರಲು ಜಗವೆಲ್ಲ,
ಎದ್ದಿರುವೆ ನಾನೊಬ್ಬ ನಡೆಯುವೆನು ಇರುಳೆಲ್ಲ .


ಜೊತೆಯಲ್ಲಿ ನಡೆಯುತಿದೆ ಬರಿಯ ಪ್ರತಿಬಿಂಬ
ಎದೆ ಬಡಿತಗಳಿವೆ ಮನಸಿನಾ ತುಂಬ ..


ಒಮ್ಮೆ ಯಾರೋ ಎನ್ನ ಕಾಣುವರೆನ್ನುವಾ ತವಕ
ಒಬ್ಬನೇ ನಡೆಯುವೆನು ಅಂದಿನಾ ತನಕ ..


ಮನಸನೆಲ್ಲೋ ವಿಭಜಿಸಿದ ರೆಖೆಯಾ ಮೇಲಿಂದು,
ನಡೆಯುತಿಹೆ ಹಾಗೆಯೇ ಸುಮ್ಮನೆ ನಾನಿಂದು .


ಅಂಚಿನಲ್ಲಿರುವ ಆ ಗಡಿ ರೆಖೆಯಾ ಮೇಲಿಂದು ,
ನಡೆಯುತಿಹೆ ಒಬ್ಬನೇ ಹಾಗೆಯೇ ನಾನಿಂದು .


ರೇಖೆಗಳ ಮಧ್ಯ ನಾ ದೂರದಲಿ ನಿಂತು ,
ಯೋಚಿಸಿದೆ ಜೀವನದ ಸರಿ ತಪ್ಪುಗಳೆಂತು.


ಒಂದೊಮ್ಮೆ ನೋಡು ಬಾ ನಾಡಿ ಮಿಡಿತಗಳನ್ನು ,
ಬದುಕಿರುವೆ ಜೀವನದಿ ನಡೆಯುವೆನು ನಾನಿನ್ನೂ....!
 
                                                   - ಅಪೂರ್ವ ಚಂದ್ರ

ಸುಮ್ಮನೆ(A hand at poetry)

                                                           ಸುಮ್ಮನೆ




ಜುಳುಜುಳನೆ ಹರಿಯುತಿಹ ನೀರ ಹನಿಗಳಲೆಲ್ಲ ನಿನ್ನ ಮೊಗವೇ ಇಹುದು ಯಾಕೆ ಹೀಗೆ..?

ಕಾಡು ಹಕ್ಕಿಗಳೆಲ್ಲ ಜೊತೆಗೂಡಿ ಹಾಡುತಿರೆ ನಿನ್ನ ಹೆಸರನೆ ಎಲ್ಲ ಅಂದಹಾಗೆ ..


ಕಣ್ಣ ನಾ ಮುಚ್ಚಿರಲು ಮನದ ಬಾನಂಗಳದಿ ಕಣ್ಣ ಮುಚ್ಚಾಲೆ ನೀ ಆಡಿದಂತೆ ..

ಅಡಗಿರುವ ನೀ ಕಳೆದು ಹೋಗಿಹೆ ಇಂದು ಮನದೊಳಗೆ ತುಂಬಿಹುದು ನಿನ್ನದೇ ಚಿಂತೆ ..!


ಚಂದ್ರ ತಾರೆಗಳಲ್ಲಿ ಹುಡುಕುವುದ ನಾನರಿಯೆ ..

ಎಲ್ಲಿಯೇ ಅಡಗಿದರು ನಿನ್ನ ನಾ ಮರೆಯೆ..


ಕೆಂಗುಲಾಬಿಗಳನೆಲ್ಲ ಕಿತ್ತು ತರುವೆನು ಮೆಲ್ಲ ..

ನೀಡುವೆನು ನಿನಗವನು ದಿನವೂ ನಾನೆಲ್ಲ ..


ಸೋಲ ನಾ ಒಪ್ಪಿದರು ಬಳಿ  ಬಾರೆಯೇಕೆ..?

ಬಳಿಬರಲು ನಿನಗೊಂದು ಸಿಹಿಮುತ್ತು ಬೇಕೇ..?


ಯಾಕೆ ಅಡಗಿದೆ ನೀನು ಮನದ ಮಾತದು ಏನು..?

ಕೇಳಲೇ ಕಾದಿರುವೆ ಈ ನಿನ್ನ ನಾನು ...


                                   - ಅಪೂರ್ವ ಚಂದ್ರ .